Hnub no, peb lub neej uas peb paub nyob rau hauv ntiaj teb no tau pauv rau tej yam uas tsuas yog nyob rau hauv txoj kev tham thiab dab neeg los yog hauv tej movie peb tau pom, uas tsis yog ib yam uas tau tshwm sim tseeb rau hauv lub ntiaj teb no dua.
Tus kab mob Coronavirus no tau ua rau txhua lub teb chaws, tej nom tsej tswv tau los tawm cov cai uas tshiab thiab tsis tau hnov dua los pab haiv neeg ntiaj teb los ceev tus kab mob Coronavirus los yog COVID-19 no.
Es peb txhua tug tsis hais cov laus uas hnub nyoog 65 xyoo rov sauv thiab muaj lwm yam mob xws li ntshav siab, ntshav qab zib, los yog kab mob plawv mob siab, los yog cov ib nrab neej ua nej tseem tab tom nyiam tawm rooj mus koom tej koob tsheej loj thiab me, mus koom kwv tij neej tsa kev noj kev haus – thov peb ib tug saib thiab xyuas ib tug, pib los ntawm koj tus kheej, koj tsev neeg, koj tej txheeb ze, koj tej phooj ywg, thiab koj tej neighbors uas nyob cheev tsam ntawm koj mus rau koj lub zej lub zos, lub teb chaws thiab haiv neeg ntiaj teb.
Lub sij hawm no, tsis yog lub sij hawm uas peb ib tug yuav los ntxub ntxaug thiab tawm tsam ib tug. Tab sis yog lub sij hawm uas ib tug yuav tau txhawb nqa ib tug, ib tug txhawj xeeb txog ib tug. Vim yog ib tug twg ze ntawm koj muaj mob nkeeg rau yam kab no lawm, nws muaj feem uas yuav kis tau los rau koj tus kheej thiab cov txheeb ze, los yog pab pawg ze nws tau.
Vim yog tus kab mob no muaj feem yuav kis tau rau cov neeg uas nyob ze ua ke sai heev. Yog li no, tej nom tej tswv twb tau tshaj tawm lawv tej cai los pab tiv thaiv kom sawv daws tsis txhob kis tus kab no lawm, peb sawv daws yuav tau ua peb txoj hauj lwm los mus pab thiab.
Sawv daws cov uas mus sib txheeb yuav zaub yuav mov ntau ntau tshaj li qhov yus siv los khaws cia noj tsheej xyoo – yog ib yam uas tsis pab rau peb lub zej zos los yog lub teb chaws. President Trump twb tau tshaj tawm rau sawv daws tias kom sawv daws tsis txhob yuav tsheej pawg zaub mov noj cia es pom muaj npaum twg los yuav tag nrho li vim yog yus muaj nyiaj. Sawv daws yuav tsum tau yuav txaus yus tsev neeg noj, thiab ho cia rau lwm tsev neeg yuav kom txaus lawv tsev neeg thiab. Lub teb chaws Mekas no ib lub teb chaws loj, dav, thiab muaj technology siab. Txawm yog tus kab mob no yeej los kis loj thiab dav lawm los, lawv yeej yuav muaj txoj kev los pab daws thiab cawm sawv daws rau ib ncua sij hawm sai xwb. Es yus yuav zaub mov los kav yus tsev neeg tsheej ib ob xyoo, ces lwm tsev neeg twb raug kev txom nyem lawm; vim tsis yog txhua tsev neeg yuav muaj nyiaj ntau npaum li ntawd mus yuav tseg. Thiab cov khw yeej tsis muaj peev xwm yuav thauj tej khoom ntau npaum li ntawv rau nej yuav los khaws cia noj tsheej xyoo.
TUS KAB MOB NO YEEJ YUAV DHAU MUS, THIAB YOG SAWV DAWS KOOM TES UA KE, PEB NEEG NTIAJ TEB YEEJ YUAV TSUM UA TAU THIAB DHAU MUS SAI SAI TOM NTEJ NO RAWS LI TEJ TSOOM FWV TAU TEEV TSEG THIAB XAV. TAB SIS, LUB SIJ HAWM NO, QHOV TSEEM CEEB YOG PEB YUAV TSUM TAU UA TXHUA YAM PEB UA TAU, XWS LI (Xiam xab lab/Sacrifices) los pab peb tus kheej, peb tsev neeg, tej phooj ywg tej ywg, peb lub zej zos, peb lub teb chaws, thiab haiv neeg ntiaj teb.
Ua tsaug ntau.
Ted Vang
